ኮይና ተሪፋ ድያ ኣደዳ ስንፍላል

ተፈሪዳ እምበርኣር ክትብል ጸለል መለል

ሓደ ክሳብ ትስእን ምሳኣ ዘዕልል

ክንደየናይ’ሞ ከይርህዎ ብኣኣዘሽካዕልል።

                          ስጋብ ምዓስ’ያባ ቃዚና ክትነብር

                          ከም ወላድ መኻን ንበይና ክትወፍር

                          ሪህይዋ ዘይፈልጥ እንትርፎ ሸገርገር

                         ዶስ ተፈሪዳ’ያ ተኾርምያ ክትነብር።

ከመይ’ሉ ይተርፍ ፍረ ጻማ ተራርሕሪሑ

ውሑዳት መዓስ ነይሮም ምእንቲ ክብራ ዘቃልሑ

ጸገማ ዝመሃሮም ናብ ቃልሲ ዘምርሑ

 ክንደየናይ ግን ከይጥዕሞም እቶም ዝምክሑ።

                          ክውገድ ወጽዓኺ ኩሉ ዝግበር ጌርኪ

                          ምእንቲ ክብሪ ሃገር ዘወፈኺ ውልድ’ኪ

                          ትጽቢትኪ ብዘይምንባሩ ክትካእ ዘመነ ምልኪ

                          እምነትኪ’ውን ኣይጸንሐን ክትነብዒ ደኒንኪ

                          ኣይሓሰብኪዮም ድማጸልማት ክወርሰኪ።

ሕጽረታት ድዩ ሃልይዎም ጸገምኪ ክፈትሑ

ዶስ ብቕዓት ውሒድዎም ናብ ጥፍኣትኪ ዘምርሑ

ከተድልዮም ጥራይ ካብ ድቃሶም ዝነቕሑ

 ንዕግበቶም ክብሉ ብኣኺ ዝጭርሑ።

                            እንትርፎ ንጥፍኣትኪ ንድሕነትኪ ዘይበቕዑ

                            እንተጸገጊምዎም ንብዓት ሓርገጽ ዝነበዑ

                           ምስ ረሃዎም ንኹሉ ዝርስዑ

                           ክዳኖም ካባ ክድዓት ስጋ ሰብ ዝበልዑ

                           ብወላዲት ኣዴኦም ቁማር ዝጣልዑ።

እምበር…..

ኣደ ራህዋ’ኮያ ነይራ ተስፋ ናይ ኩልትና

 ኩለንተነኣ ዘበጀወት ምእንቲ ክብርና

ሂወታ ዘወፈየት ነዛ ክብርቲ ሃገርና

መሰላት ክረጋገጽ ክብሪ መንነትና

ክንግዘም ሓርነትና ምልክት ህላዌና።

                          ስለምንታይ ምላሽ ኣይረኸበን ሕቶ ኣደታትና

                          እንታይ እዋኑ ተረሲዑ ሕድሪ ሰማእታትና

                         ስጋብ ክንድዚ ዝፈታተን ንጥርኑፍ ሓድነትና

                        ብኽድዓት ክሳብ ዝርገጽ ክቡር መሰላትና።

 ምላሽ ክረክብ ኢለ ኣይኮንኩን ካብ እዝኒ ዘይብሎም

ከብዶም እንተመሊኣ ጥሙይ ዘሎ ዘይመስሎም

እንትርፎ ንሽርሒ ጉርሒ ቅንዕና ዘይተዓደሎም

ንሓቂ ዝርሕቅዋ ፍትሒ ዝጎደሎም።

                           ስለምንታይ ኣድለየ ትጽቢት

                           ክሳብ መዓስ’ዩ ክሕብሐብ ምልካዊ ስርዓት

                     ዋላስ ምፍራሱ ጸጊሙና ደምበ ናይ ከደዓት

                     ወይ ተጸንቂቑ ሓይልና ስኢናሉ ብልሓት።

ዎ…! ኣደ ራህዋ ቅንዕ ኢልኪ ስምዕኒ

 ብርሃን ገጽኪ ክሪኦ ተስፋ እንተኾነኒ

ክምስ’ውን በልኒ ሓበን ክስመዓኒ

ምእንታን ክፍጽም ኩሉ ዝበልክኒ።

                              እምበር…..

                          ኣነስ ኣይደለኹን እንዳ ህግደፍ ዝእለም

                          ኣሎ እንዳበልካዮ ቀልጢፉ ዝጠልም

                          ካልእ ሕብሪ ዘይብሉ እንትርፎ ቀይሕ ቀለም

                          ብርሑቕ ዝልለ ዋላ ኣብ ድቕድቕ ጸላም

                         ካብ’ዚ ዝኸፍአ ደኣ እንታይ ኣሎ ኣብ ዓለም።

ስለዚ….

ነባሪ ክዳን’ዩ ዘድሊየኒ ዘይርሳዕ ንዘለኣለም

ዝጥለም መዓስ ስኢነ ኣደ ራህዋ ዝጠልም

ሕልናይ ኣየፍቅድን ወላዲተይ ክጠልም።

                    ካብ መም/ር ይከኣሎ

                  ተጋ/ህደግኤ

                  ዕለት 2.12.2009