|
ወሊድኪ’ንዶ ኣይነበርክን ብኣኺ ዝሓስቡ
ፈጢርኪ’ንዶ ኣይጸናሕክን ንጸጋኺ ዝጠልቡ
ኣይደቅኽን’ድዮም ቀልቢ ዓለም ዝሰሓቡ
ምእንታኺ ክብሉ ሂወቶም ዝሃቡ
ብባዕዲ ከይትርገጺ ደም ዝተሓቡ።
እወ..ወልድኪ’ኺ ነርኪ ናይ ዓለም ጀጋኑ
ኣብነት ውጹዓት ጽንዓት ዝወነኑ
ድሌትኪ ንምርዋይ ሓይሊ ጸላኢ ዘምከኑ
ንፋሽሽታውነት ብመትከል ዝኾነኑ
ንዓሌታውነት ብቕልጽሞም ዘበርዓኑ።
ዋላውን እንተጸበበ እንተተሳእነ መስሎኺ
ወልድኪ’ኺ ብዘይ ቃልዓልም ኣዝዮም ዘፍቅሩኺ
ኩለንተንኦም ወፊዮም ዝሓስቡ ስለኺ
ሕሰም ከይዓጀቦም ዝወደቑ ምእንታኺ
ምእንቲ ክብርኺ ዝተበጀው ንዓኺ።
ክትኮንሎም ተቓሊሶም ናይ ዕንጋለ ራህያ
ክትኮንሎም ብምድላይ ናይ ኣፍሪቃ ፍቕያ
ተባሂልኪ’ውን ነይርኪ ፈራይት ሰብ ሞያ
ንዓለም ዘመስከሩ ብጀግነታዊ ቅያ።
ሰብ ዝበለ እንተበለ ፍጹም ከይዓጀቦም
ዝጥምትዎ ኣይነበረን ልዕሊ ክብሪ ሃገሮም
ዝሪእዎውን የለን ልዕሊ ወጽዓ ህዝቦም
ንሱ ምዃኑ እቲ መፍትሒ ይፈልጡ ብምንባሮም።
ጥበብ ዓመጸኛ ንዕኦም እንታዮም
ትምክሕቲ ባዕዳውያን ክምህ እንከየበሎም
ብናይ ገዛእቲ ዓጀውጀው ከይተሰልበ ቀልቦም
ብኣጽዋር ሓያላን ከይተዳህለ ሓድነቶም
ትርጉም ምንባርና ድሕሪ ሃገር ምዃኑ ፈሊጦም
ነዚ’ዩ እቲ ሓቂ መኽፈሊ ሂወቶም።
ልዋመይ……
ንስኺ’ውን ብወገንኪ ኣይሓመቕክን ነይርኪ
ሓብሒብኪዮም ኢኺ ትስፍዋት ክኾንልኪ
ጸጋኺ ክሪኡ ኣርሒኽሎም ቤትኪ
ስንቂ’ውን ኣስኒቕክዮም ከፊትኪ ታሪኽ’ኪ።
ኩሉ ዝግበር ገይርኪ ምእንታን ክርህዎም
ብጸሓይ ከይነዱ ጽላልኪ ኣንቢርክሎም
ከብዶም ብጥምዩ ተስፋ ኣዒንጊልዮም
ብቑሪ ከይግረፉ ሓመድኪ ኣልቢስኪዮም
ከይጠምዩ ከይጸምኡ ባህሪ ከብድኺ ከፊትክሎም።
እሞኸ….
ንሶም ጥራይ ድዮም እቶም እትኣምንዮም
ወይስ ዝቕበል ስኢንኪ መብጸዐኦም
ዶስ…ተስፋ ስኢንክልና ነቶም ዝተረፍና ብድሕሪኦም
ንገርና ምስጢርኪ ከይገበርኪ ቃል-ዓለም።
እምበር…..
ትርእዮ እንዶ’የለኽን መዓስ ጠፊኡኪ
ዝፍጸም ዘሎ በደል ኣብ ልዕሊ ወላድኪ
ዝፈስስ ዘሎ ደም ኣብ ርእሲ መሬትኪ
እሞ ነዚ እንዳረኣኺ ካን ዲኺ ጨኪንኪ።
ሕድሪ ደቅኺ ዝጠለሙ በየንከ ነጠቡ
ኣብ ክንዲ ራህዋኺ ክትጽገሚ ዝሓስቡ
ንምዕባለ ወጊዶም ንድሕረት ዝጠልቡ
ንሰላም ተሓሲሞም ቡንባታት ዘዝንቡ።
ስለዚ…
ይኣክል በልዮም ኣሕድግዮም መንበርኪ
ቀልጢፉ ክውገድ ኩሉ ጸገማትኪ
ክጽገን ክሕደስ ዝዓነወ ቤትኪ
ምእንታን ክርህወኪ ክትስዕሚ ውላድኪ።
ክንደይ’ሎ ምጽማም ወጊድ ደኣ በምዮም
ከም ሰይጣን በዓቲ ደም ዝቐለቦም
ዳግም ከይምለሱ ረመጽ ከዓውሎም
ሓንሳእን ንሓዋሩን ደሓን ኩኑ በልዮም።
በሊ….
ንሱ’ዩ መልእኽተይ ኣንቲ ልዋም መሬት
ከም’ቶም ዝቐደሙ ኣለውልኪ ኣብ ቅድሚት
ሰላም ተቐኒቶም ዝልግሱ ቅሳነት
ቅንዕና ሰኒቖም ዘሕድሱ ኒያት
ፈጺሞም ዘይቅበሉ ራህዋ ኣልቦ ሂወት
ጽንዓት ዝወነኑ ክንድሕን ካብ ከርተት
ገጽኪ መልስሎም ክትረኽቢ ምስተርሆት።!
ብመምር ይከኣሎ
ተጋ/ህዝባዊ ደሞክራስያዊ ግንባር ኤርትራ
/ ህደግኤ/
|
